Kya Banae Sane-E-Qudrat Ne Pyare Hath Panw

kya banae sane-e-qudrat ne pyare haath paanv

nuur ke sanche men Dhale hain tumhare haath paanv

zoaf-e-piri chha gaya zor-e-javani chal basa

ab chalen batlaiye kis ke sahare haath paanv

machhliyan baazu pe ubhrin saq-e-pa shamen banin

khuub sahab ne nikale ab to baare haath paanv

fauq hiire se nahin hai meri jaan yaqut ko

kyuun range hain aap ne mehndi se saare haath paanv

mani-o-bahzad ne mulk-e-adam ki raah li

vo kamar mutlaq na paai laakh maare haath paanv

ham na kahte the ki har dam shokhiyan achchhi nahin

akhirash mehndi ne bandhe lo tumhare haath paanv

hatha-pai men bhi ham chuke na apne kaam se

vasl ki shab yaar ne kya kya na maare haath paanv

hai zaifi men bhi ham ko naujavani ka khayal

dil nahin haara hai ab tak go ki haare haath paanv

ghair ki dhamki se ham Dar jaaen ye mumkin nahin

aise buude bhi nahin hain kuchh hamare haath paanv

maadan-e-yaqut ko dariya banaya aap ne

mehndi mal kar dhoe jab dariya kinare haath paanv

is budhape men bhi ‘agha’ so javan men ek hai

go zaifi aa gai par hain karare haath paanv

Leave a Comment