lutf to jab hai ki tujh sa tira divana bane
rind ki shaan ye hai nazish-e-mai-ḳhana bane
ghair mahfil men nahin koi tumhin tum ho yahan
haif apne hi se tum aaj to begana bane
qais ko ishq ki takrim thi shayad kam-kam
ham tunak-zarf nahin ishq jo afsana bane
ḳhuub badnam kiya ham ko bana kar parda
aap hi sham.a bane aap hi parvana bane
ishq phir ishq hai zahid tujhe malum nahin
ham jahan sar ko jhuka den dar-e-janana bane
dil jo afsurda o mahzun hai to jiina be-kar
ziist vo hai jo chhalakta hua paimana bane
shan-e-divangi-e-ishq mili tujh men ‘bashir’
dars le tujh se mohabbat men jo divana bane
Leave a Reply