Lutf to Jab Hai Ki Tujh Sa Tera Diwana Bane

lutf to jab hai ki tujh sā tirā dīvāna bane

rind kī shaan ye hai nāzish-e-mai-ḳhāna bane

ġhair mahfil meñ nahīñ koī tumhīñ tum ho yahāñ

haif apne hī se tum aaj to begāna bane

qais ko ishq kī takrīm thī shāyad kam-kam

ham tunak-zarf nahīñ ishq jo afsāna bane

ḳhuub badnām kiyā ham ko banā kar parda

aap hī sham.a bane aap hī parvāna bane

ishq phir ishq hai zāhid tujhe mālūm nahīñ

ham jahāñ sar ko jhukā deñ dar-e-jānāna bane

dil jo afsurda o mahzūñ hai to jiinā be-kār

ziist vo hai jo chhalaktā huā paimāna bane

shān-e-dīvāngī-e-ishq milī tujh meñ ‘bashīr’

dars le tujh se mohabbat meñ jo dīvāna bane

Leave a Comment