Mere Siwa Bhi Koi Giraftar Mujh Mein Hai

Irfan Sattar

mere siva bhi koi giraftar mujh men hai

ya phir mira vajud hi bezar mujh men hai

meri ghazal kisi ke takallum ki bazgasht

ik yar-e-ḳhush-kalam-o-tarah-dar mujh men hai

had hai ki tu na meri aziyyat samajh saka

shayad koi bala ka adakar mujh men hai

jis ka vajud vaqt se pahle ki baat hai

vo bhi adam se barsar-e-paikar mujh men hai

tu hai ki teri zaat ka iqrar har-nafas

main huun ki meri zaat ka inkar mujh men hai

tujh se na kuchh kaha to kisi se na kuchh kaha

kitni shadid ḳhvahish-e-iz.har mujh men hai

main kya huun ka.enat men kuchh bhi nahin huun main

phir kyuun isi saval ki takrar mujh men hai

jis din se main visal ki asudgi men huun

us din se vo firaq se do-char mujh men hai

main huun ki ek pal ki bhi fursat nahin mujhe

vo hai ki ek umr se be-kar mujh men hai