Apne Jaanan Ko Ai Jaan Isi Jaan Mein DhunDh

apne jānān ko ai jaan isī jaan meñ DhūñDh

DhūñDh mat aur jagah par dil-e-hairān meñ DhūñDh

DhūñDhnā us kā bahut sahl batāyā hai faqīr

jaan meñ apnī use lūñgā maiñ ik aan meñ DhūñDh

jis taraf dekho usī kā hai jhamkaḌā vallāh

tālib allāh kā letā hai har ik shaan meñ DhūñDh

chāhne vaale kā ḳhud aap chahītā hai vo

mah-e-kan.āñ ko liyā thā chah-e-kan.ān meñ DhūñDh

zāhirā dekh suḳhan-fahm suḳhan ‘āfrīdī’

ġhair-maḳhlūq suḳhan ma.anī-e-qur.ān meñ DhūñDh

Leave a Comment