shu.ur-e-zat thoḌa sa dil-e-nadan men rakhte hain
jamal-e-agahi jahl-e-ḳhirad-afshan men rakhte hain
chaman kaisa bayaban kya simaT aa.egi ye duniya
junun ke dam se itni vus.aten daman men rakhte hain
nazar ke samne rahta hai aks-e-gardish-e-dauran
ham a.ina ko dil ke rauzan-e-zindan men rakhte hain
hujum-e-gham men yadon ke nihan-ḳhane mahak uTThe
shagufe lala-zaron ke dil-e-viran men rakhte hain
hamare soz-e-dil se nuur barsati hain vo ankhen
ham apni sham.a taq-e-abru-e-janan men rakhte hain
hamari har nazar un ki nazar men Duub jaati hai
ham apna tiir un ke tiir ke paikan men rakhte hain
koi dastak koi aahaT koi jhonka koi ḳhushbu
‘faridi’ dil ko bas zinda isi arman men rakhte hain
Leave a Reply