vo ek lamha jise javedan kaha jaa.e
mile to hasil-e-umr-e-ravan kaha jaa.e
unhin se ruuh ko farhat unhin se dil ko qarar
vo hadsat jinhen jan-sitan kaha jaa.e
isi men chand mohabbat ke din bhi shamil hain
tamam umr ko kyon ra.egan kaha jaa.e
mire nasib men likhe na ja sake tum se
vo chaar tinke jinhen ashiyan kaha jaa.e
mire hujum-e-tamanna ki aḳhiri manzil
bas ek marg jise na-gahan kaha jaa.e
ada-e-tamkanat-e-husn ka taqaza hai
har ik sitam pe unhen mehrban kaha jaa.e
har ek qatre men sau sau hikayaten hongi
hazar dida-e-tar be-zaban kaha jaa.e
harim-e-dil men kahin rah ga.i ḳhalish ban kar
kisi ki yaad jise nish-e-jan kaha jaa.e
hamare ashk hi jab ‘nur’ rakh sake na bharam
phir aur kis ko bhala razdan kaha jaa.e
Leave a Reply