dar aaya andhera ankhon men aur sab manzar dhundlae hain
ye vaqt hai dil ke dubne ka aur shaam ke gahre saae hain
ye zara zara si khushiyan bhi to laakh jatan se milti hain
mat chhedo ret-gharondon ko kis mushkil se ban paae hain
vo lamha dil ki aziyyat ka to guzar gaya ab sochne do
kya kahna hoga un se mujhe jo pursish-e-gham ko aae hain
jalti hui shamon ne aksar ehsas ki raakh ko bhadkaya
qurbat men damakte chehron ki tanhai ke dukh yaad aae hain
sochon ko tar-o-taza rakkha ‘shabnam’ tire paiham ashkon ne
hairat hai ki ahd-e-khizan men bhi ye phuul nahin kumhlae hain