zindagi dil pe ajab sehr sa karti jaa.e
ik jagah Thahri lage aur guzarti jaa.e
ansuon se koi avaz ko nisbat na sahi
bhigti jaa.e to kuchh aur nikharti jaa.e
dekhte dekhte dhundla ga.e manzar saare
teri zulfon ki tarah shaam bikharti jaa.e
baat ka raaz khule baat ka andaz khule
tere honTon se chale dil men utarti jaa.e
rafta rafta kisi gum-nam lahu ki tahrir
qatil-e-shahr ke daman pe ubharti jaa.e
ho ke barbad chale sehn-e-chaman se nik.hat
dasht-o-sahra ki magar jholiyan bharti jaa.e
main ne kab da.ava-e-ilham kiya hai ‘taban’
likh diya karta huun jo dil pe guzarti jaa.e
Leave a Reply