Zamin Se Ta-Ba-Falak Koi Fasla Bhi Nahin

Arif Abdul Mateen

zamin se ta-ba-falak koi fasla bhi nahin

magar ufuq ki taraf koi dekhta bhi nahin

suna hai sabz rava oḌh li chaman ne magar

hava ke zor se barg-e-ḳhizan gira bhi nahin

bahut basit hai dasht-e-jafa ki tanha.i

qarib-o-dur koi ahu-e-vafa bhi nahin

mujhe to ahd ka ashob kar gaya patthar

main dard-mand kahan dard-ashna bhi nahin

kabhi ḳhayal ke rishton ko bhi TaTol ke dekh

main tujh se duur sahi tujh se kuchh juda bhi nahin

qadam qadam pe shikaston ka samna hai magar

ye dil vo shisha-e-jan hai ki TuTta bhi nahin

mire vajud men barpa hai us ḳhayal se hashr

jo mere zehn men paida abhi hua bhi nahin

main jis ke sehr se koh-e-nida tak aa pahuncha

vo harf abhi mire lab se ada hua bhi nahin

main ek gumbad-e-be-dar men qaid huun ‘arif’

miri nava ka safar varna be-dara bhi nahin