Zulfiqar Naqvi
vaqt ke paas kahan saare havale honge
zeb-e-qirtas faqat yaas ke haale honge
khojta kya hai andheron men tafahum ke diye
aa charaghon men lahu Daal ujale honge
dasht men ja ke zara dekh to aa.e koi
zarre zarre ne mire ashk sambhale honge
yuun to maqdur nahin tujh ko tiri qismat par
haan magar tu ne ka.i sikke uchhale honge
ham the ḳhushbu ke ḳharidar magar kya ma.alum
surḳh phulon ne yahan saanp bhi paale honge
Leave a Reply