Waqt Ke Pas Kahan Sare Hawale Honge

vaqt ke paas kahāñ saare havāle hoñge

zeb-e-qirtās faqat yaas ke haale hoñge

khojtā kyā hai añdheroñ meñ tafāhum ke diye

aa charāġhoñ meñ lahū Daal ujāle hoñge

dasht meñ jā ke zarā dekh to aa.e koī

zarre zarre ne mire ashk sambhāle hoñge

yuuñ to maqdūr nahīñ tujh ko tirī qismat par

haañ magar tū ne ka.ī sikke uchhāle hoñge

ham the ḳhushbū ke ḳharīdār magar kyā ma.alūm

surḳh phūloñ ne yahāñ saañp bhī paale hoñge

Leave a Comment