nazar milte hi barse ashk-e-ḳhun kyuun dida-e-tar se
ragen qalb-o-jigar ki chheḌ diin kya tum ne nashtar se
yaqinan kuchh ta.alluq hai tire dar ko mire sar se
vagarna lauh-e-peshani ka kya rishta hai patthar se
mire pahlu men hai abad armanon ki ek duniya
hazaron mayyaten uThengi mire saath bistar se
vo apni zulf bikhra kar tasavvur hi men aa jaate
ye saaya bhi uTha ab to miri ummid ke sar se
vafa ne hasrat-e-kushta ka us ko ḳhun-baha samjha
gira jo ashk daman par lahu ka dida-e-tar se
suna.un tum ko vo lafzon men hal-e-ḳhubi-e-qismat
mire daman par barse bhi to ashkon ke guhar barse
miri hasti miTane vaale shayad tu nahin vaqif
ki miT kar bhi banegi ek duniya mere paikar se
ḳhayal-e-abla-pa.i ‘vaqar’ ik uzr-e-be-ja tha
na ghar tha duur manzil se na manzil duur thi ghar se
Leave a Reply