agar dasht-e-talab se dasht-e-imkani men aa jaate
mohabbat karne vaale dal pareshani men aa jaate
hisar-e-sabr se jis roz main bahar nikal aata
samundar ḳhud miri a.ankhon ki virani men aa jaate
agar saa.e se jal jaane ka itna ḳhauf tha to phir
sahar hote hi suraj ki nigahbani men aa jaate
junun ki azmaton se ashna.i hi na thi varna
jo the ahl-e-ḳhirad sab chak-damani men aa jaate
kisi zardar ki yuun naz-bardari se behtar tha
kisi ujḌe hue dil ki bayabani men aa jaate
Leave a Reply