Tashna Azmi
vo apni jhiil si ankhen jo le kar ashk-bar aa.e
bhala aise men kis zalim ko dil par iḳhtiyar aa.e
sanvarti hi nahin qismat unhin hathon se ab apni
ki jin hathon se vo qismat hazaron ki sanvar aa.e
nahin jab vasta koi raha apna gulistan se
hamen kya farq hai yaaro ḳhizan aa.e bahar aa.e
ḳhuda jaane abhi baaqi hain kitne tiir tarkash men
ga.e jab bhi ham us ke dar pe vapas dil-figar aa.e
jinhen da.ava tha dil ki saḳht-jani ka hamin par vo
zara si Thes kya pahunchi ki rote zar-zar aa.e
jahan darman hai vahshat ka usi manzil se ham ‘tashna’
gareban chak-chak aa.e to daman tar-tar aa.e
Leave a Reply