Rashida Maheen Malik
ik ḳhayal-afroz mauj aa.i to thi
main ne apni satr mahka.i to thi
tum nahin the yaad thi har su muhit
main nahin thi meri tanha.i to thi
dar-ba-dar be-pairahan tha ḳhvab-e-ishq
main ne us ko aankh pahna.i to thi
phir mujhe us ne kaha sab jhuuT hai
ek lamhe ko main ghabra.i to thi
duur tak bichhta chala jaata tha shauq
kuchh nahin tha dasht-paima.i to thi
kyuun mujhe dariya bulata hai qarib
us ki ankhon men bhi gahra.i to thi
kyuun zamin-o-asman hain raqs men
aur kya tha ek angḌa.i to thi
lamha bhar ko hi Dhala tha aftab
lamha bhar ko raah dhundla.i to thi
main ki haq par DaT ga.i thi ‘rashida’
us ki baton men bhi sachcha.i to thi
Leave a Reply