ḳhvab tha arman tha kya kuchh tiri palkon pe tha
vo hamara zikr jo kal tak tire honTon pe tha
vo musafir pa-ba-jaulan jaane kyuun lab-doz the
ek jaisa dard-e-afsana sabhi chehron pe tha
ḳhush-nasibon ko pahaḌon se ḳhazane mil ga.e
mujh ko vo bhi mil na paaya jo mire honTon pe tha
marhaba tera hunar to bhuul bhi kaise saki
vo zamana jab hamara haq tiri sanson pe tha
ḳhud-baḳhud raz-e-mohabbat munkashif karta raha
vo gulabi aks jo raqsan tire galon pe tha
Leave a Reply