Anwar Minai
mahfuz rahega kya ehsas ka a.ina
patthar ke muqabil hai almas ka a.ina
ab chehra-e-mazi bhi pahchana nahin jaata
yuun TuuT ke bikhra hai itihas ka a.ina
mafhum to mabni hai qaari ki basirat par
alfaz se raushan hai qirtas ka a.ina
is ahd men rishton ki be-rang dukanon men
hiire se bhi mahnga hai vishvas ka a.ina
is shahr men yuun phaili azar ki parchha.in
har shaḳhs ka chehra hai ab yaas ka a.ina
Leave a Reply