Nit-Nai KHush-Fahmiyon Mein Mubtala Rakhta Hun Main

Khalid Shirazi

nit-na.i ḳhush-fahmiyon men mubtala rakhta huun main

ḳhalq ke hathon ko masruf-e-dua rakhta huun main

ḳhushk dharti ko ata karta huun saaya abr ka

qatra-e-baran pe dariya ki bina rakhta huun main

DhunDh hi leti hai mujh ko DhunDne vaali nazar

apne saa.e ko agarche lapata rakhta huun main

kyuun bhala asudgi mere muqaddar men nahin

kis liye din-rat ḳhud ko jagta rakhta huun main

phunkta rahta huun bahr-e-lafz men ‘ḳhalid’ fusun

mauj-e-ma.ani ko talatum-ashna rakhta huun main