guzishta shab jo itni raushni thi
tumhari yaad ki jalvagari thi
faza men gungunahaT thi ajab si
hava patton se baten kar rahi thi
ghazal jaisa sarapa tha kisi ka
koi surat mukammal sha.iri thi
tire alfaz nishtar ban ga.e the
mohabbat intiha par aa ga.i thi
suna hai ba.ad mere kuchh dinon tak
vo miTTi par lakiren khinchti thi
vo gaahe ab palaT kar dekhti hai
koi ik baat kahna rah ga.i thi
vahi ham hain vahi tira-shabi hai
mohabbat chaar din ki chandni thi
labon par qahqahe hi qahqahe the
koi laḌki thi ya vo phuljaḌi thi
koi dil men achanak aa basa tha
mohabbat ki nahin thi ho ga.i thi
Leave a Reply