ab mujh ko gale lagao sahib
yak shab kahin tum bhi aao sahib
rutha huun jo tum se main to mujh ko
aa kar ke tumhin manao sahib
baithe raho mere samne tum
az bahr-e-khuda na jaao sahib
kuchh khuub nahin ye kaj-adai
har lahza na bhaun chadhao sahib
rakhte nahin parda ghair se tum
jhuti qasmen na khaao sahib
dar-guzre ham aisi zindagi se
itna bhi na ji jalao sahib
ya ghair ki chaah bhuul jaao
ya dil se hamen bhulao sahib
tum vaqt ke apne ho masiha
murde ke taiin jilao sahib
miyan-‘mushafi’ yaar aa milega
itna bhi na tilmilao sahib