hijab-e-fitna-parvar ab utha leti to achchha tha
khud apne husn ko parda bana leti to achchha tha
tiri nichi nazar khud teri ismat ki muhafiz hai
tu is nashtar ki tezi aazma leti to achchha tha
tiri chin-e-jabin khud ik saza qanun-e-fitrat men
isi shamshir se kar-e-saza leti to achchha tha
ye tera zard rukh ye khushk lab ye vahm ye vahshat
tu apne sar se ye badal hata leti to achchha tha
dil-e-majruh ko majruh-tar karne se kya hasil
tu aansu ponchh kar ab muskura leti to achchha tha
tire zer-e-nagin ghar ho mahal ho qasr ho kuchh ho
main ye kahta huun tu arz-o-sama leti to achchha tha
agar khalvat men tu ne sar uthaya bhi to kya hasil
bhari mahfil men aakar sar jhuka leti to achchha tha
tire mathe ka tiika mard ki qismat ka taara hai
agar tu saz-e-bedari utha leti to achchha tha
ayaan hain dushmanon ke khanjaron par khuun ke dhabbe
unhen tu rang-e-ariz se mila leti to achchha tha
sananen khinch li hain sar-phire baghi javanon ne
tu saman-e-jarahat ab utha leti to achchha tha
tire mathe pe ye anchal bahut hi khuub hai lekin
tu is anchal se ik parcham bana leti to achchha tha
Leave a Reply