Na Aae Lab Pe to Kaghaz Pe Likh Diya Jae

Aqeel Nomani

na aa.e lab pe to kaghaz pe likh diya jaa.e

kisi ḳhayal ko mayus kyon kiya jaa.e

kisi pe miTne miTane se fa.eda kya hai

maza to jab hai kisi ke liye jiya jaa.e

vo dekhta hai vazahat-talab nigahon se

main chahta huun ishara samajh liya jaa.e

ye soch kar ki akele safar pe jaana hai

ye chahta huun safar multavi kiya jaa.e

nazar bacha.e guzar ja.un paas se us ke

use bhi aaj zara sa Dara diya jaa.e

hain mai-kade bhi khule aur cha.e-ḳhane bhi

chalo ‘aqil’ kahin chal ke kuchh piya jaa.e