zer hone na diya himmat-e-ali ne mujhe
sar-kashida hi rakha sarv-ḳhayali ne mujhe
itne chehre to na the arzang-e-mani ko nasib
jitne chehre diye a.ina-ḳhayali ne mujhe
main ne mansub kiya ḳhun-e-jigar se varna
sher baḳhshe tire ruḳhsar ki laali ne mujhe
dil ne razzaq-e-do-alam ko pukara kya kya
rah men roka jo kisi dast-e-savali ne mujhe
ye qalam-ru-e-suḳhan hai to chalo yuun hi sahi
mulk tafviz kiya jo mire vaali ne mujhe
Leave a Reply