avara-e-ghurbat huun Thikana nahin milta
navak huun mujhe koi nishana nahin milta
jin logon men rahta huun main un men se nahin huun
huun kaun mujhe apna zamana nahin milta
divar to is daur men milti hai ba-har-gam
lekin tah-e-divar ḳhazana nahin milta
muddat se hai ashkon ka talatum pas-e-mizhgan
rone ke liye koi bahana nahin milta
muddat se tamanna hai ki ye bojh utaren
muddat se koi dost purana nahin milta
hai raḳhsh subuk-sair bahut umr-e-ravan ka
gir jaa.e koi shai to uThana nahin milta
Leave a Reply