Madan Mohan Danish
kuchh us maqam se ab dil ka karvan guzre
yaqin ki had se jo guzre to be-zaban guzre
ye ittifaq kahan hai ki aankh bhar aa.i
mohabbaton men koi kaise be-nishan guzre
mujhi se ho ke guzarti hai raah duniya ki
so mujh se ho ke zamin aur asman guzre
ta.alluqat men vo marhale bhi kaise the
yaqin aur guman ke jo darmiyan guzre
tilism-e-rang men uljhe hue hain sab ‘danish’
jo dekhne hain vo manzar abhi kahan guzre
Leave a Reply