Aziz Nabeel
mira saval hai ai qatilan-e-shab tum se
ki ye zamin munavvar hui hai kab tum se
charagh baḳhshe ga.e shahr-e-be-basarat ko
ye kar-e-ḳhair bhi sarzad hua ajab tum se
vo ek ishq jo, ab tak hai tishna-e-takmil
vo ek daagh jo raushan hai roz-o-shab tum se
miri numud men vahshat hai, meri soch men shor
bahut alag hai miri zindagi ka Dhab tum se
mire ḳhitab ki shiddat pe chiḳhne vaalo
tumhare lahje men goya hua huun ab tum se
shikasta rishton ki hathon men Dor thame hue
main puchhta huun mire dosto sabab tum se
tumhare naam ki tohmat hai mere sar pe ‘nabil’
juda hai varna mira shajra-e-nasab tum se
Leave a Reply