Maher Chand Kausar
tasvir men rang bhar rahe hain
milne ka irada kar rahe hain
ḳhushiyan hi nahin thiin saath mere
gham bhi mere ham-safar rahe hain
ankhen to khuli hui thiin phir bhi
har baat se be-ḳhabar rahe hain
koi rahat mili na ahl-e-fan ko
aram se be-hunar rahe hain
baaqi nahin dil men shauq-e-parvaz
muddat se be-bal-o-par rahe hain
urdu si zaban pe kuchh muḳhalif
har samt se vaar kar rahe hain
ik umr se ahl-e-dil ke Dere
talvar ki dhaar par rahe hain
mushtaq to ja chuke hain ‘kausar’
ab kis liye ban-sanvar rahe hain
Leave a Reply