husul-e-faqr gar chahe to chhod asbab-e-duniya ko
laga de aag yaksar bistar-e-sanjab-o-diba ko
rakhe hain haq-parastan tark-e-jamiyyat men jamiyyat
mayassar hove ye daulat kahan arbab-e-duniya ko
fareb-e-rang-o-bu-e-dahr mat kha mard-e-aqil ho
samajh atish-kada is gulshan-e-shadab-e-duniya ko
siyah-mast-e-mai-e-tahqiq ho gar pak-tinat hai
najis mat jaam kar tu bhar ke bas khunab-e-duniya ko
ye hai ‘bedar’ zahr-aluda maar is se hazar karna
na lena haath men tu gesu-e-pur-tab-e-duniya ko
Leave a Reply