Jameel Malik
ye manzar ye ruup anokhe sab shahkar hamare hain
ham ne apne ḳhun-e-jigar se kya kya naqsh ubhare hain
sadiyon ke dil ki dhaḌkan hai un ki jagti ankhon men
ye jo falak par hansmukh chanchal jagmag jagmag taare hain
ek zara si bhuul pe ham ko itna tu badnam na kar
ham ne apne ghaao chhupa kar tere kaaj sanvare hain
kuchh baten kuchh raten kuchh barsaten apna sarmaya
maazi ke andhiyare men ye jalte diip hamare hain
ek jahan ki khoj men apne pyaar ki nagri chhoḌ aa.e
aur zamana ye samjha ham pyaar ki baazi haare hain
sab se hans kar milne vaale ham ko kisi se bair nahin
duniya hai mahbub hamen aur ham duniya ko pyare hain
Leave a Reply