Akhlaque Bandvi
abhi ashkon men ḳhuun shamil nahin hai
mohabbat ka junun kamil nahin hai
zamane se mohabbat ka abhi tak
ye hasil hai ki kuchh hasil nahin hai
na ankhen phoḌ is dasht-e-junun men
ye rah-e-naqa-e-mahmil nahin hai
zamin par baiTh ja ai shaiḳh tu bhi
ye bazm-e-mai tiri mahfil nahin hai
tabibon se kaho ghar lauT jaaen
ye dard-e-dil vo dard-e-dil nahin hai
hamin ‘aḳhlaq’ us se be-ḳhabar hain
kisi pal ham se vo ghafil nahin hai
Leave a Reply