Afzal Allahabadi
ab to har ek adakar se dar lagta hai
mujh ko dushman se nahin yaar se dar lagta hai
kaise dushman ke muqabil vo thahar paega
jis ko tuuti hui talvar se dar lagta hai
vo jo pazeb ki jhankar ka shaidai ho
us ko talvar ki jhankar se dar lagta hai
mujh ko balon ki safedi ne khabar-dar kiya
zindagi ab tiri raftar se dar lagta hai
kar den maslub unhen laakh zamane vaale
haq-paraston ko kahan daar se dar lagta hai
vo kisi tarah bhi tairak nahin ho sakta
duur se hi jise manjdhar se dar lagta hai
mere angan men hai vahshat ka basera ‘afzal’
mujh ko ghar ke dar-o-divar se dar lagta hai
Leave a Reply