ḳhvahish-e-jada-e-rahat se nikalta kaise
dil mira ku-e-malamat se nikalta kaise
saya-e-vahm-o-guman chaar taraf phaila hai
main abhi karb-o-aziyyat se nikalta kaise
meri rusva.i agar saath na deti mera
yuun sar-e-bazm main izzat se nikalta kaise
meri nazren jo na paḌtin to vahan pichhli shab
ik sitara sa tiri chhat se nikalta kaise
main ki barbad hua diid ki ḳhatir jis ki
vo mire dida-e-hairat se nikalta kaise
us ke dam hi se to qaa.em hai mira jah-o-jalal
vo mire dil ki hukumat se nikalta kaise
jaag baiTha huun to dil Duuba nahin hai ‘aḳhtar’
soya rahta to musibat se nikalta kaise
Leave a Reply