Tahir Adeem
bila javaz nahin hai ghurur ankhon men
basa hua hai koi to zarur ankhon men
tasalliyon ka charaghan shafiq honTon par
mohabbaton ki anokhi sutur ankhon men
vazu-e-did juda.i men bhi mayassar hai
hain garche duur magar hain huzur ankhon men
ki raat dudhiya chadar men ḳhvab lipTe the
tamam din tha raha us ka nuur ankhon men
ruke hue kisi sailab ki safarat ko
kiya hai ashk ne phir se zuhur ankhon men
jiya hai dasht-e-dil-o-jan had-e-muayyan men
kiya hai aankh ka dariya ubuur ankhon men
ḳhumar-e-dard men ‘tahir-adim’ sab masrur
hain mastiyan si saron men surur ankhon men
Leave a Reply