Khaleel Rampuri
ye jo rishta hai mera miTTi se
ruup saara hai mera miTTi se
sabza kahta hai luuTe jaao mujhe
dil kushada hai mera miTTi se
main sitara nahin huun suraj huun
gahra rishta hai mera miTTi se
main to ḳhud-rav daraḳht huun lekin
peT bharta hai mera miTTi se
mutma.in huun ki fasl achchhi hai
siina ThanDa hai mera miTTi se
har haveli men diip raushan hai
gaanv zinda hai mera miTTi se
jo kahunga vo sach kahunga ‘ḳhalil’
kyunki rishta hai mera miTTi se
Leave a Reply