Ahl-E-Gulshan Rahzan Ko Rahbar Kahne Lage

Poet

ahl-e-gulshan rahzan ko rahbar kahne lage

tirgi itni baḌhi shab ko sahar kahne lage

ibtida ye thi dar-o-divar se aata tha ḳhauf

intiha ye hai ki ham sahra ko ghar kahne lage

tu bhi kah de mujh ko divana ki divana mujhe

ab to tere shahr ke divar-o-dar kahne lage

ehtiyat ai zabt-e-gham aisa na ho un ke huzur

ham chhupa.en hal-e-dil aur chashm-e-tar kahne lage

haa.e tauhin-e-junun ‘nashtar’ ki arbab-e-junun

ḳhushk kanTe hain jinhen gul-ha-e-tar kahne lage