Ghulam Murtaza Rahi
shakl sahra ki hamesha jani-pahchani rahe
mere aage pichhe daa.en baa.en virani rahe
saari samten aa ke jis markaz pe ho jaati hain ek
ḳham usi janib hamesha meri peshani rahe
aage aage main tira parcham liye chalta rahun
arz-e-dil par mere qaa.em teri sultani rahe
raushni ko ho miri aisa koi maḳhaz ata
zarra-e-nachiz men din raat tabani rahe
neza-o-shamshir-o-ḳhanjar ki agar ifrat hai
ḳhuun ki bhi meri rag rag men faravani rahe
meri kashti ko Dubo kar chain se baiThe na tu
ai mire dariya! hamesha tujh men tughyani rahe
ab tajavuz ban gaya ma.amul varna muddaton
apni apni had men shahri aur bayabani rahe
Leave a Reply