adu ho gaya aadmi aadmi ka
ajab daur hai ye na.i raushni ka
ulajhte hain nasli-tanafur men insan
miTa kar na rakh den ye naam aadmi ka
bas ik saans hai aa.e aa.e na aa.e
bharosa nahin hai koi zindagi ka
kudurat ko chhoḌo mohabbat baḌhao
ye duniya hai mela ghaḌi do ghaḌi ka
farishton se nisbat mujhe dene vaalo
nahin jante tum maqam aadmi ka
gham-e-la-zaval ik ata kar ke mujh ko
ada kar diya tu ne haq dosti ka
jo saaqi ki ḳhatir hi pi luun to pi luun
nahin shauq varna mujhe mai-kashi ka
baḌi chiiz hai mehr-o-ulfat bhi ‘sabir’
isi men hai poshida gauhar ḳhushi ka
Leave a Reply