aao patjhaḌ men kabhi haal hamara dekho
ḳhushk patton ke sulagne ka tamasha dekho
paas aa kar mire baiTho mujhe apna samjho
jab bhi ruThi hui yaado mujhe tanha dekho
phuul har shaḳh pe khilte hain bikhar jaate hain
kya tamasha hai sar-e-naḳhl-e-tamanna dekho
kabhi ham-rang-e-zamin hai kabhi ham-dosh-e-falak
kohsaron se uchhalta hua dariya dekho
khulti jaati hai shafaq rangi-e-ḳhun-ta-ba-sahar
shab ke siine men jo paivast hai neza dekho
yuun to ghar hi men simaT aa.i hai duniya saari
ho mayassar to kabhi ghuum ke duniya dekho
unhi ankhon men utar jaati hai har shaam ‘jamil’
unhi ankhon se nikalta hai savera dekho
Leave a Reply