muztarib huun ab ye ji ki baat hai
afv kiije be-khudi ki baat hai
saikdon ushshaq ke tode hain dil
kya tumhari nazuki ki baat hai
kya ajab puchhe na koi hashr men
ek ye bhi be-kasi ki baat hai
jis fughan se mangte the sab panah
ab vo ik be-taqati ki baat hai
muddaten guzrin visal-e-yar ko
meri nazron men abhi ki baat hai
kahte hain anjam us ka maut hai
jis qadar gham ho khushi ki baat hai
iztirab-e-shauq men kahni padi
jo tiri azurdagi ki baat hai
ai dil ummid is se hai tasir ki
ye fughan hai ya vali ki baat hai
phirte hain ahd-e-vafa se ham koi
ye bhi tum se aadmi ki baat hai
sach kaha hai dil ko hai ik dil se raah
un ke lab par mere ji ki baat hai
ghair se kuchh kah ke mujh se kahte hain
tum ko kya matlab kisi ki baat hai
vaada kyuun karte ho kah doge abhi
yaad kis ko hai kabhi ki baat hai
mujh pe vo hangama guzra hai ki log
kal kahenge aaj hi ki baat hai
dahr men ‘salik’ ye phaila hai nifaq
dosti bhi dushmani ki baat hai
Leave a Reply