khud ko bahlana tha akhir khud ko bahlata raha
main ba-in soz-e-darun hansta raha gaata raha
mujh ko ehsas-e-fareb-e-rang-o-bu hota raha
main magar phir bhi fareb-e-rang-o-bu khata raha
meri duniya-e-vafa men kya se kya hone laga
ik daricha band mujh par ek va hone laga
ik nigar-e-naz ki phirne lagin ankhen ‘majaz’
ik but-e-kafir ka dil dard-ashna hone laga
ain hangam-e-tarab ruh-e-tarab tharra gai
dafatan dil ke ufuq par ik ghata si chha gai
ek aghosh-e-tamanna ka taqaza dekh kar
ek dil ki sard-mehri bhi mujhe yaad aa gai
mujrim-e-sartabi-e-husn-e-javan ho jaiye
gul-fishani ta-kuja shola-fishan ho jaiye
khaiega ik nigah-e-lutf ka kab tak fareb
koi afsana bana kar bad-guman ho jaiye
Leave a Reply