aghaz-e-ishq umr ka anjam ho gaya
nakamiyon ke gham men mira kaam ho gaya
tum roz-o-shab jo dast-ba-dast-e-adu phire
main paemal-e-gardish-e-ayyam ho gaya
mera nishan mita to mita par ye rashk hai
vird-e-zaban-e-khalq tira naam ho gaya
dil chaak chaak naghma-e-naqus ne kiya
sab paara paara jama-e-ehram ho gaya
ab aur dhundiye koi jaulan-gah-e-junun
sahra ba-qadr-e-vusat-e-yak-gam ho gaya
dil pech se na turra-e-pur-kham ke chhut saka
bala-ravi se murgh tah-e-dam ho gaya
aur apne haq men taan-e-taghaful ghazab hua
ghairon se multafit but-e-khud-kam ho gaya
tasir-e-jazba kya ho ki dil iztirab men
taskin-pazir bosa-ba-paigham ho gaya
kya ab bhi mujh pe farz nahin dosti-e-kufr
vo zid se meri dushman-e-islam ho gaya
allah-re bosa-e-lab-e-mai-gun ki aarzu
main khaak ho ke durd-e-tah-e-jam ho gaya
ab tak bhi hai nazar taraf-e-bam-e-mah-vash
main garche aftab-e-lab-e-bam ho gaya
ab harf-e-na-saza men bhi un ko daregh hai
kyuun mujh ko zauq-e-lazzat-e-dushnam ho gaya