sar uTha kar na kabhi dekha kahan baiThe the
girti divar ka saaya tha jahan baiThe the
sab the masruf andheron ki ḳharidari men
ham saja.e hue sham.on ki dukan baiThe the
yahi shohrat ka sabab honge ye ma.alum na tha
ham chhupa.e hue zaḳhmon ke nishan baiThe the
log to bujhte charaghon ke dhuen se ḳhush the
ham hi be-kar jala.e hue jaan baiThe the
mai-kada aur bhi tanha.i ka saman nikla
ham ki tanha.i se tang aa ke yahan baiThe the
Leave a Reply