Sahar Mahmood
jo hain havas ke pujari vo mal-o-zar ke liye
nahin hai ḳhauf unhen ḳhuun ka ḳhuun bahane men
tamam ahd-e-javani guzar gaya yuun hi
unhen hamen aur hamen un ko azmane men
kisi se kuchh na kahenge hon laakh gham ab to
bahut hai zillat-o-rusva.i gham sunane men
tamam umr mira gham se bas raha rishta
maza sa aane laga mujh ko zaḳhm khane men
suna hai rab use uqba men baḳhsh deta hai
saza.en deta hai jis ko ‘sahar’ zamane men
Leave a Reply