sochiye gar use har-nafas maut hai kuchh mudava bhi ho be-hisi ke liye
surajon ki virasat mili thi hamen dar-ba-dar ho ga.e raushni ke liye
koi avaz hai vo koi saaz hai us se hi rang-o-nik.hat ka dar-baz hai
jis taraf ho nazar vo rahe jalva-gar kaise sochenge ham phir kisi ke liye
bad-dimaghi miri hai vahi jo ki thi tarz-e-ḳhud-bin tumhara vo hai jo ki tha
chal rahe hain ana ke sahare magar rasta hi nahin vapsi ke liye
ho salamat mira ishq josh-e-junun husn ke raaz ḳhud munkashif ho ga.e
itni mushkil nahin rahguzar-e-fana be-ḳhudi chahiye agahi ke liye
Leave a Reply