vahshat men har ik naqsha ulTa nazar aata hai
majnun nazar aati hai laila nazar aata hai
ai murgh-e-sahar kukḌunkun bol kahin jaldi
tu bhi shab-e-furqat men gunga nazar aata hai
daḌhi ko tiri vaa.iz sab dekh ke kahte hain
vo qasr-e-taqaddus ka chhajja nazar aata hai
baaz aa.e mohabbat se ai ishq ḳhuda-hafiz
ulfat men jise dekho andha nazar aata hai
kuchh tujh ko ḳhabar bhi hai dekh aa.ine men surat
o tirchhi nazar vaale bhinga nazar aata hai
svaraj ke chakkar men rahte the jo sargardan
un logon ko ab ḳhali charḳha nazar aata hai
Leave a Reply