Hazar Bandish-E-Auqat Se Nikalta Hai

Zafar Iqbal

hazar bandish-e-auqat se nikalta hai

ye din nahin jo miri raat se nikalta hai

vo raushni men bhi hota nahin kahin maujud

jo rang mah-e-mulaqat se nikalta hai

mujhe bahut hai jo khushbu ka ek jhonka sa

kabhi kabhi tire baghat se nikalta hai

isi navah men abad huun kahin main bhi

dhuan jo mere mazafat se nikalta hai

dil aur tarha ke halat se ulajhta hua

kuchh aur tarha ke halat se nikalta hai

subut saara hamare khilaf bhi ab to

hamare apne bayanat se nikalta hai

jo charon samt girani ki hai faravani

to qahat bhi isi buhtat se nikalta hai

vo lahn jis ka sarokar hi nahin mujh se

kabhi to vo bhi miri zaat se nikalta hai

‘zafar’ ye bais-e-tashvish bhi hai sab ke liye

jo matlab aur miri baat se nikalta hai