Hayat Amrohvi
jal raha tha dil charagh-e-arzu ḳhamosh tha
ham the vaqf-e-hasrat-e-didar vo ru-posh tha
mere nalon ne to mahshar aaj hi barpa kiya
husn to roz-e-azal se hashr dar aghosh tha
ham javan ho kar agar mad.hosh hain to kya ajab
marne jiine ka laḌakpan men hamen kab hosh tha
kaise kaise gul khila.e ek musht-e-ḳhak ne
meri barbadi men poshida numu ka josh tha
uff shab-e-furqat ki haibatnak tariki ‘hayat’
main misal-e-sham.a jalta tha magar ḳhamosh tha
Leave a Reply