Wo Meri Raaten Meri Aankhon Mein Aa Kar Le Gai

vo miri raten miri ankhon men aa kar le ga.i

yaad teri chor thi ninden chura kar le ga.i

zindagi ki Diary men ek hi to giit tha

koi miThi dhun use bhi gunguna kar le ga.i

sardiyon ki gunguni si dhuup ke ehsas tak

mere man ki chandni mujh ko bula kar le ga.i

ek ḳhushbu sa main apni pankhuḌi men band tha

aa.i ik pagal hava mujh ko uḌa kar le ga.i

raah men thak kar jahan baiThi agar ye zindagi

maut aa.i baanh thami aur uTha kar le ga.i

varna tu bhi raah men girta chala jaata ‘kunvar’

vo to ik Thokar thi jo tujh ko bacha kar le ga.i