Abu Mohammad Sahar
ab tak ilaj-e-ranjish-e-be-ja na kar sake
ik umr men bhi husn ko apna na kar sake
thi ek rasm-e-ishq so ham ne bhi ki ada
duniya men koi kaam anokha na kar sake
kal raat dil ke saath bujhe is tarah charagh
yadon ke silsile bhi ujala na kar sake
ab is se kya gharaz hai ki anjam kya hua
ye to nahin ki teri tamanna na kar sake
khud ishq hi ko de gae rusvaiyon ke daagh
vo raz-e-husn ham jinhen ifsha na kar sake
zauq-e-junun ko raas nahin tang bastiyan
sahra na ho to kya koi divana kar sake
har imtiyaz us ke liye hech hai ‘sahar’
jo apni zindagi ko tamasha na kar sake
Leave a Reply