uḌti rahti thi sada ḳhitta-e-viran men ḳhaak
aa ga.i chupke se ab ke mire dalan men ḳhaak
mutma.in tha main ki andhi ko thame arsa hua
ghaur se dekha to qabiz thi dil-o-jan men ḳhaak
ḳhvahishen chaak pe rakkhi hain ki surat ubhre
gard ke saath mili hai mire arman men ḳhaak
jis ko bhi dekho vo bad-hal nazar aata hai
ab to daḳhil hui insan ke iman men ḳhaak
bhagti-dauḌti duniya men kise fursat hai
jamti jaati hai yahan miir ke divan men ḳhaak
jaane kya guzrega ab qais pe allah jaane
ret sahra men nahin aur na bayaban men ḳhaak
Leave a Reply