Shakeel Badayuni
ishq ki chingariyon ko phir hava dene lage
mere paas aa kar vo dushman ko dua dene lage
mai-kade ka mai-kada khamosh tha mere baghair
main hua varid to paimane sada dene lage
khatm karna hi padengi sham-e-gham ki uljhanen
ab vo apne gesuon ka vasta dene lage
eatiraf-e-auj ka jazba nahin ahbab men
har taraqqi par taraqqi ki dua dene lage
doston ki kaj-adai main bhi lazzat hai ‘shakil’
dost vo hai dost ban kar jo dagha dene lage
Leave a Reply